Հայաստանի Հանրապետության Վճռաբեկ դատարանի նախագահ Լիլիթ Թադևոսյանը 2023 թվականի մայիսի 2-ին ընդունել է Հայաստանի Հանրապետությունում Ամերիկայի Միացյալ Նահանգների արտակարգ և լիազոր դեսպան Քրիստինա Քվինին։

       ՀՀ Վճռաբեկ դատարանի նախագահն իր ողջույնի խոսքում շնորհավորել է դեսպան Քրիստինա Քվինին՝ Հայաստանի Հանրապետությունում դիվանագիտական առաքելությունը ստանձնելու կապակցությամբ, և վստահություն հայտնել, որ նրա պաշտոնավարման ընթացքում ՀՀ-ում ԱՄՆ դեսպանատան և ՀՀ Վճռաբեկ դատարանի միջև ձևավորված կառուցողական համագործակցությունը շարունակական կլինի:

       Դեսպան Քրիստինա Քվինը, շնորհակալություն հայտնելով ընդունելության համար, կարևորել է ՀՀ Վճռաբեկ դատարանի և ԱՄՆ դեսպանատան միջև ձևավորված համընդգրկուն փոխգործակցության դրական փորձը և պատրաստակամություն հայտնել շարունակելու այն։ 

       Հանդիպման ընթացքում ՀՀ Վճռաբեկ դատարանի նախագահն ընդգծել է, որ ԱՄՆ դեսպանատան հետ փոխգործակցության շրջանակներում կազմակերպվել են արտասահմանյան այցեր՝ այդ թվում ԱՄՆ Գերագույն դատարան, կոնֆերանսներ և կլոր սեղան-քննարկումներ՝ նվիրված արդարադատության ոլորտում կանանց դերին, ընտանեկան բռնության, ինչպես նաև թմրամիջոցների ապօրինի շրջանառության, փողերի լվացման և անդրազգային բնույթի այլ հանցագործությունների դեմ պայքարի միջազգային լավագույն փորձի ուսումնասիրությանը։

       Հանդիպման ընթացքում ՀՀ Վճռաբեկ դատարանի նախագահը ներկայացրել է ՀՀ Վճռաբեկ դատարանում տեղի ունեցած կառուցվածքային բարեփոխումներն ու միաժամանակ ընդգծել, որ պետության կողմից որդեգրված՝ կոռուպցիայի դեմ անզիջում պայքարի ինստիտուցիոնալ հիմքերի ձևավորման նկատառումներով, Հայաստանի Հանրապետությունում ստեղծվել է հակակոռուպցիոն մասնագիտացված դատարանների եռաստիճան դատական համակարգ։ ՀՀ Վճռաբեկ դատարանում ձևավորված մասնագիտացված հակակոռուպցիոն պալատն ունի կառուցվածքային ուրույն մոդել, ամփոփում է իր գործունեության մեջ համակարգման նոր ոլորտ՝ օրենսդրական նոր առանձնահատկություններով։ Պալատի ստեղծումը նպատակ է հետապնդում ամբողջացնել հակակոռուպցիոն ինստիտուցիոնալ դատական համակարգը՝ վճռաբեկության մակարդակով ապահովելով կոռուպցիոն բնույթի գործերի մասնագիտացված վերանայում։

     Հանդիպման ավարտին, կողմերը վերահաստատեցին փոխգործակցությունը շարունակելու, այն ամրապնդելու և համագործակցության նոր ուղիներ մշակելու պատրաստակամությունը: