Սույն թվականի ապրիլի 9-ին, ՀՀ Վճռաբեկ դատարանի նախագահ Լիլիթ Թադևոսյանը մասնակցել է Եվրոպայի խորհրդի կողմից իրականացվող՝ «Աջակցություն Հայաստանի կողմից Մարդու իրավունքների եվրոպական կոնվենցիայի 6-րդ հոդվածով կայացված վճիռների կատարմանը» ծրագրի պաշտոնական մեկնարկի միջոցառմանը և ծրագրի Ղեկավար հանձնաժողովի առաջին առցանց հանդիպմանը։

Միջոցառմանը մասնակցել են նաև Եվրոպայի խորհրդի Մարդու իրավունքների հարցերով տնօրեն Քրիստոֆ Պուարելը և Մարդու իրավունքների եվրոպական դատարանի վճիռների կատարման վարչության բաժնի ղեկավար Պավլո Պուշկարը, Եվրոպայի խորհրդի՝ «Աջակցություն Հայաստանի կողմից Մարդու իրավունքների եվրոպական կոնվենցիայի 6-րդ հոդվածով կայացված վճիռների կատարմանը» ծրագրի ղեկավար Վահե Դեմիրճյանը։ Ծրագրի պաշտոնական մեկնարկի միջոցառմանը մասնակցել են նաև ՀՀ Վճռաբեկ դատարանի քրեական պալատի նախագահ Համլետ Ասատրյանը և ՀՀ Վճռաբեկ դատարանի աշխատակազմի իրավական փորձաքննությունների ծառայության ղեկավար Աշխեն Ղարսլյանը։

ՀՀ Վճռաբեկ դատարանի նախագահ Լիլիթ Թադևոսյանը ծրագրի բացմանը հանդես է եկել ողջույնի խոսքով՝ կարևորելով ՀՀ Վճռաբեկ դատարանի և Եվրոպայի խորհրդի միջև տարբեր ծրագրերի շրջանակներում ձևավորված արդյունավետ համագործակցությունն ու այդ համատեքստում մեկնարկող ծրագրի նշանակությունը։ ՀՀ Վճռաբեկ դատարանի նախագահն ընդգծել է ծրագրի նպատակների առաջնայնությունն ու կարևորությունը՝ հատկապես «Մարդու իրավունքների և հիմնարար ազատությունների պաշտպանության մասին» եվրոպական կոնվենցիայի 16-րդ արձանագրության շրջանակներում Մարդու իրավունքների եվրոպական դատարանի հետ համագործակցության արդյունավետ ընթացակարգեր կառուցելու առումով։

ՀՀ Վճռաբեկ դատարանի նախագահը, բարձր գնահատելով Մարդու իրավունքների Եվրոպական դատարանի և ՀՀ Վճռաբեկ դատարանի միջև արդյունավետ երկխոսության խթանումը, ներկաներին տեղեկացրել է, որ «Մարդու իրավունքների և հիմնարար ազատությունների պաշտպանության մասին» եվրոպական կոնվենցիայի 16-րդ արձանագրության կիրառման շրջանակներում, ՀՀ Վճռաբեկ դատարանի քրեական պալատը, դեռևս 2021 թվականի հունվարի 27-ին, խորհրդատվական կարծիք ստանալու նպատակով դիմել է Մարդու իրավունքների եվրոպական դատարան։

Ծրագրի մեկնարկի միջոցառման ավարտից անմիջապես հետո ՀՀ Վճռաբեկ դատարանի նախագահ Լիլիթ Թադևոսյանը մասնակցել է նաև «Աջակցություն Հայաստանի կողմից Մարդու իրավունքների եվրոպական կոնվենցիայի 6-րդ հոդվածով կայացված վճիռների կատարմանը» ծրագրի Ղեկավար հանձնաժողովի առաջին նիստին, որի ընթացքում քննարկվել են ծրագրի կողմից իրականացվելիք միջոցառումները։