Ծնվել է 1971 թվականի դեկտեմբերի 14-ին՝ Գյումրիում։

1989 թվականին գերազանցությամբ ավարտել է թիվ 29 միջնակարգ դպրոցը։ Նույն թվականին ընդունվել և 1994 թվականին ավարտել է Երևանի պետական համալսարանի իրավաբանական ֆակուլտետը։ 1993 թվականի մայիսի 17-ին ընդունվել է աշխատանքի ՀՀ Գերագույն Խորհրդի քարտուղարի օգնականի պաշտոնում։

1995 թվականին ընդգրկվել է Կենտրոնական ընտրական հանձնաժողովի կազմում։

1995 թվականի հոկտեմբերի 10-ից աշխատել է ՀՀ Ազգային Ժողովի պետական-իրավական հարցերի մշտական հանձնաժողովում` որպես առաջատար մասնագետ։

1996 թվականի մայիսի 23-ին նշխանակվել է ՀՀ արդարադատության նախարարության կադրերի և հատուկ աշխատանքների վարչության պետի պաշտոնում, իսկ նույն ամսվա 29-ին համատեղության կարգով զբաղեցրել է ՀՀ Ազգային Ժողովի պետական-իրավական հարցերի մշտական հանձնաժողովի առաջատար մասնագետի պաշտոնը, որտեղ աշխատել է մինչև 1997 թվականի հուլիսի 1-ը։

1997 թվականի դեկտեմբերի 30-ին ՀՀ արդարադատության նախարարի հրամանով Հ.Մանուկյանին շնորհվել է Արդարադատության երկրորդ դասի խորհրդականի դասային աստիճան, իսկ 1998 թվականի դեկտեմբերի 30-ին՝ Արդարադատության երրորդ դասի պետական խորհրդականի դասային կոչում:

1998 թվականին ներգրավվել է ՀՀ Նախագահին առընթեր Սահմանադրության փոփոխություններ նախապատրաստող հանձնաժողովի կազմում։

1999 թվականի հունվարի 12-ին, ՀՀ Նախագահի 1999 թվականի հունվարի 5-ի հրամանագրով նշանակվել է ՀՀ տնտեսական գործերով վերաքննիչ դատարանի նախագահ։

2001 թվականի հոկտեմբերի 19-ին ՀՀ Նախագահի հրամանագրով Հ.Մանուկյանը նշանակվել է ՀՀ Տնտեսական դատարանի նախագահ:

2005 թվականի հունիսի 9-ին ՀՀ Նախագահի հրամանագրով նշանակվել է ՀՀ Վճռաբեկ դատարանի նախագահ և պաշտոնավարել մինչև 2008 թվականը: