2024 թվականի հոկտեմբերի 10-ին, Հայաստանի Հանրապետության Վճռաբեկ դատարանի նախագահ Լիլիթ Թադևոսյանն ընդունել է Հայաստանի Հանրապետությունում Ամերիկայի Միացյալ Նահանգների դեսպանատան Թմրամիջոցների դեմ պայքարի և իրավապահ համագործակցության (ԹՊԻՀ/INL) գրասենյակի նորանշանակ տնօրեն Զաքարի Բարթերի գլխավորած պատվիրակությանը։

 Հանդիպմանը պատվիրակության կազմում մասնակցել է Հայաստանի Հանրապետությունում Ամերիկայի Միացյալ Նահանգների դեսպանատան ԹՊԻՀ «Քրեական արդարադատության բարեփոխումների» ծրագրի ղեկավար Քրիստինա Աֆոյանը:

 Միջոցառմանը մասնակցել են նաև Վճռաբեկ դատարանի քրեական պալատի նախագահ Համլետ Ասատրյանը և հակակոռուպցիոն պալատի նախագահ Արթուր Դավթյանը։ 

 Կարևորելով Հայաստանի Հանրապետությունում ԱՄՆ դեսպանատան Թմրամիջոցների դեմ պայքարի և իրավապահ համագործակցության գրասենյակի հետ համագործակցությունը, Վճռաբեկ դատարանի նախագահն ընդգծել է, որ այդ շրջանակում արդյունավետորեն իրականացվել են մի շարք միջոցառումներ, այդ թվում՝ արտասահմանյան այցեր, կլոր սեղան-քննարկումներ՝ նվիրված թմրամիջոցների ապօրինի շրջանառության, կիբեռհանցագործությունների, փողերի լվացման և անդրազգային բնույթի այլ հանցագործությունների դեմ պայքարում միջազգային լավագույն փորձի ուսումնասիրությանը, և մի շարք այլ հիմնախնդիրների։

 Հանդիպման ընթացքում երկուստեք ընդգծվել է ապագայում համագործակցության նոր ուղիների մշակման և համատեղ ծրագրերի իրագործման կարևորությունն ու վերահաստատվել փոխգործակցությունը շարունակելու և ամրապնդելու պատրաստակամությունը: