13.10.2026

THE COURT OF CASSATION HAS ESTABLISHED THE MINIMUM REQUIREMENTS FOR THE REASONING OF A DECISION AUTHORIZING EXTRADITION

  ՀՀ Վճռաբեկ դատարանը ԵԴ1/0229/11/26 վարույթով 2026 թվականի հոկտեմբերի 9-ին կայացրած որոշմամբ անդրադարձել է անձին Չինաստանի Ժողովրդական Հանրապետությանը հանձնելու թույլտվության մասին ՀՀ գլխավոր դատախազի որոշման պատճառաբանվածության բովանդակային պահանջներին։

  Վճռաբեկ դատարանն արձանագրել է, որ հանձնման վարույթում չի լուծվում անձի դեմ ներկայացված քրեական մեղադրանքի հարցը Եվրոպական կոնվենցիայի 6-րդ հոդվածի իմաստով։ Ուստի հանձնման թույլտվության որոշման նկատմամբ ամբողջ ծավալով կիրառելի չեն այն պահանջները, որոնք ներկայացվում են քրեական մեղադրանքը հիմնավորող դատավարական ակտին։ Հայաստանի Հանրապետության և Չինաստանի Ժողովրդական Հանրապետության միջև հանձնման մասին պայմանագիրը երկակի քրեականացվածությունը գնահատում է արարքի, այլ ոչ թե հանցակազմի հիման վրա։ Արարքի փաստական նկարագիրը ձևավորվում է հայցող պետության հարցմամբ, և հենց այդ տեսքով էլ այն գնահատվում է։ Հետևաբար իրավասու մարմինը պարտավոր չէ մատնանշել ՀՀ քրեական օրենսգրքով նախատեսված կոնկրետ հանցակազմը կամ իր որոշման մեջ վերաշարադրել հարցման բովանդակությունը։

  Վճռաբեկ դատարանն ընդգծել է, որ իրավասու մարմնի որոշումը հանձնման հարցման և կից փաստաթղթերի հետ կազմում է մեկ իրավական ամբողջություն, ուստի չի կարող գնահատվել դրանցից առանձին։ Եթե ակտը հիմնավորված է, և վարույթի նյութերի ամբողջության համատեքստում դատարանն ի վիճակի է ստուգել դրա համապատասխանությունն օրենքին և միջազգային պայմանագրերին, ապա որոշման վերացումը զուտ շարադրանքային թերության պատճառով կհանդիսանա անհամաչափ հետևանք և ձևական մոտեցման դրսևորում, որն անհամատեղելի է արդարադատության էության, ինչպես նաև պայմանագրի բարեխիղճ կատարման հետ։

 

  Վճռաբեկ դատարանի որոշումը տե՛ս հետևյալ հղմամբ`  http://cassationcourt.am/precedent/precedent-single-decision/criminal-case/4181

The website development of the Court of Cassation of Armenia was supported within the Project "Supporting the criminal justice reform and harmonising the application of European standards in Armenia" co-funded by the European Union and the Council of Europe. The content and views expressed on the website of the Court of Cassation of Armenia can in no way be taken to reflect the official opinion of the European Union and the Council of Europe".